Светската побарувачка за системи за собирање сончева енергија постојано расте. Вишиот аналитичар на „Блумберг“, Роб Барнет, предвидува распоредувањето на соларната енергија оваа година да се зголеми за 30%. Вкупното глобално распоредување на системи за соларна енергија се приближува до 1 TW инсталирана моќност.
„Во овој момент, глобалната слика е едноставно запрепастувачка“, изјави Барнет за Yahoo Finance. „На пат сме да инсталираме околу 250 GW соларен капацитет оваа година“.
Кина придонесува со најголем удел во растот на капацитетот во 2022 година, со околу 108 GW нови инсталации. Тоа е речиси двојно повеќе од 55 гигавати инсталирани во земјата минатата година. Исто така, во Соединетите Држави има рекордни високи показатели за обновливите извори на енергија.
Климатските цели се еден двигател на големата побарувачка за соларна енергија ширум светот, но Барнет вели дека постои уште една пазарна сила која ја забрзува побарувачката на краток рок. „Всушност би рекол дека поголемиот двигател за побарувачката за чиста енергија, особено овде во Европа, е зголемената цена на енергијата“, коментира тој.
Побарувачката за соларна енергија ќе го задржи моментумот дури и ако цените на нафтата и природниот гас се „оладат“. „Сигурно е можно дека ако има одредено олеснување на традиционалните пазари на гориво, забрзувањето би можело да се намали, но јас навистина не го гледам тоа како значителен ризик за побарувачката во севкупната равенка на пазарот на чиста енергија“, заклучи Барнет.
Како што се забрзуваат напорите за декарбонизација, побарувачката веројатно ќе остане висока долго време, очекува и аналитичарот.