Зголемената побарувачка поттикната од транзицијата кон зелена енергија и веројатното слабеење на американскиот долар во втората половина на 2024 година ќе ги зголеми цените на бакарот, се вели во извештајот на BMI, истражувачката единица на Fitch Solutions.
Пазарите сметаат на американската централна банка, ФЕД, да ги намали каматните стапки оваа година, што ќе го ослаби доларот и ќе го направи бакарот со кој се тргува во долари попривлечен за странските купувачи.
Дополнително, на неодамнешната конференција за климатски промени COP28, повеќе од 60 земји го поддржаа планот за тројно зголемување на глобалниот капацитет за обновлива енергија до 2030 година, што, според Ситибанк, „би било исклучително поволно за бакарот“.
Во декемврискиот извештај, американската инвестициска банка предвиде дека поамбициозните цели за обновлива енергија ќе ја зголемат побарувачката за бакар за дополнителни 4,2 милиони тони до 2030 година.
Тоа потенцијално би ги зголемило неговите цени на 15.000 долари за тон до 2025 година, се додава во извештајот, што е значително над рекордните 10.730 долари за тон постигнат во март минатата година.
Економскиот раст обично ја поттикнува побарувачката за бакар бидејќи се користи во електричната опрема и индустриските машини. Побарувачката за овој метал се смета за показател за економската благосостојба.
Тој е клучен во екосистемот на транзицијата кон обновлива енергија и е од суштинско значење за производство на електрични возила, електрични мрежи и турбини на ветер. Други аналитичари предвидуваат пораст на цените на бакарот поради пореметувања во рударството, а Goldman Sachs очекува дефицит од над половина милион тони во 2024 година.
Победници на бакарниот бум ќе бидат главно Чиле и Перу, проценува BMI. Двете земји имаат големи резерви на литиум и бакар и ќе имаат корист од зголемените инвестиции и повисокиот извоз. Чиле поседува околу 21 отсто од светските резерви на бакар.