Светската здравствена организација (СЗО) денеска ги повика владите да воведат построга регулатива за производите штетни за здравјето, бидејќи извештајот на СЗО покажа дека околу 2,7 милиони луѓе годишно умираат во Европа од тутун, алкохол, преработена храна и фосилни горива.
Како што пишува „Гардијан“, во споменатиот извештај, СЗО наведува дека индустриите на тутун, алкохол и преработена храна поттикнуваат лошо здравје, па дури и прерана смрт со користење на маркетингот и со тоа мешање во напорите на светските влади да спречат болести кои можат да бидат фатални, како што се ракот, срцевите заболувања и дијабетесот, пренесува Танјуг.
Регионалниот директор на СЗО за Европа Ханс-Анри Клуге рече дека тактиките на индустриите вклучуваат искористување на ранливите луѓе преку насочени маркетинг стратегии, заведување на потрошувачите и лажни тврдења за придобивките од нивните производи или нивните еколошки акредитиви. Новиот извештај покажува дека тутунот, фосилните горива и алкохолот се одговорни за повеќе од 7.400 смртни случаи секој ден во 53 европски земји.
„И покрај здравствените ризици, само мал дел од европските земји го забранија пушењето на јавни места, додека напорите да се направат штетните производи помалку привлечни преку обична амбалажа, оданочување на алкохол и етикетирање на храната исто така не се спроведени во повеќето земји“, се вели во извештајот на СЗО.
СЗО проценува дека тутунот предизвикува повеќе од еден милион смртни случаи годишно, што е 10 отсто од сите смртни случаи во Европа. Алкохолот предизвикува повеќе од 400.000 смртни случаи годишно, а повеќе од 350.000 луѓе годишно умираат од конзумирање премногу преработено месо, слатки пијалоци и масна и солена храна.
Светскиот фонд за истражување на ракот ги повика луѓето да јадат повеќе вегетаријанска храна и да го ограничат пиењето за да го намалат ризикот од добивање на болеста.
„Истражувањата покажуваат дека јадењето разновидна храна од растително потекло, интегрални житарки, овошје и мешунки, како и ограничувањето на консумирањето алкохол, се ефективни начини за намалување на ризикот од рак“, рече менаџерката за политика и односи со јавноста на Светскиот фонд за истражување на ракот, Кендра Чоу.