Украинскиот претседател Володимир Зеленски има неочекуван сојузник во Белата куќа, Меланија Трамп, за која се верува дека му помогнала на својот сопруг, американскиот претседател Доналд Трамп, да одлучи да испорача ракетни системи „Патриот“ во Киев, објавува „Тајмс“.
Според британскиот весник, Трамп во понеделникот изјавил во Овалната соба во Белата куќа дека се вратил дома и ѝ рекол на првата дама дека имал одличен разговор со рускиот претседател Владимир Путин, на што таа одговорила: „О, навистина, значи уште еден украински град беше погоден“. Коментарите на Трамп сугерираат дека Меланија има многу поголемо влијание врз политичкото размислување на нејзиниот сопруг отколку што многумина би помислиле, објавува „Тајмс“.
Таа неодамна помина многу време надвор од Вашингтон, во нејзината резиденција Мар-а-Лаго во Палм Бич, како и во Трамп Тауер во Њујорк за да биде блиску до својот син Барон, кој е бруцош на Универзитетот во Њујорк.
Како што беше објавено во мај, првата дама поминала помалку од 14 дена во Белата куќа од инаугурацијата на Трамп, објави лондонскиот дневен весник.
Нејзиниот интерес за војната во Украина може да се објасни со нејзиното потекло, бидејќи е родена зад „Железната завеса“ во 1970 година, во поранешна Југославија, објави „Тајмс“. Меланија претходно изрази восхит кон Роналд Реган, претседателот кој помогна да се стави крај на Студената војна.
Таа, исто така, често разговара со својот син Барон на словенечки јазик, а двајцата ги задржаа своите пасоши од ЕУ.
„Наклонетоста на Меланија кон Украина воопшто не е изненадувачка со оглед на тоа што таа пораснала во поранешна Југославија, земја каде што нема љубов кон Русија“, рече Мери Џордан, авторка на книга за Меланија Трамп.
Таа додаде дека Словенија, каде што е родена првата дама, е сочувствителна кон Украина и дека жителите таму се шокирани што САД одеднаш повеќе не сакаат да ја вооружуваат Украина. Исто така, постојат докази дека Меланија претходно изразила незадоволство од војната во Украина, вели весникот.
Таа го нарече убиството на невини цивили „ужасно и срцепарателно“ и ги повика своите следбеници на социјалните мрежи да донираат на Црвениот крст, додавајќи дека нејзините мисли и молитви се со украинскиот народ.
И покрај мноштвото советници за национална безбедност и аналитичари за надворешна политика што Трамп ги има на располагање, се чини дека гласот на неговата сопруга може да биде најважен од сите, објавува британскиот весник.
„Трамп ги слуша одредени луѓе за одредени работи. Тој особено ги слуша оние што се навистина блиски до него, а особено ако нивното презиме е Трамп“, вели Мери Џордан, пренесува Танјуг.