Британската влада денеска ги намали наводите за безбедносен ризик, откако беше објавено дека бројот на мобилниот телефон на премиерот Борис Џонсон е достапен на Интернет веќе 15 години.
Порталот „Попбич“, посветен на познатите личности, објави дека телефонскиот број на Џонсон бил објавен во извештај во 2006 година, кога тој бил член на Конзервативната партија и опозициски министер за високо образование.
Оние што денес се јавија на бројот на премиерот, слушнаа порака од машината во која се вели дека телефонот е „исклучен“ и им вели да пробаат подоцна или да испратат порака.
Владата негираше какво било нарушување на безбедноста.
Министерката за внатрешни работи, Викторија Аткинс инсистираше на тоа дека премиерот „ја знае својата одговорност кога станува збор за националната безбедност“ и ги критикуваше медиумите за откривањето на фактот дека бројот е достапен на јавноста.
Поранешниот советник за национална безбедност Питер Рикетс рече дека тој број, доколку е јавно достапен, може да се искористи за прислушување од непријателска држава, а можеби и други недржавни актери, како што се софистицирани криминални банди.
Џонсон веќе се соочи со критики за размена на пораки преку „Ватсап“ со бизнисмени и лобисти.
Тој негираше дека направил нешто лошо кога се допишувал со бизнисменот Џејмс Дајсон минатата година и ветил дека ќе ги „среди“ даночните олеснувања за неговата компанија доколку се согласи да произведува респиратори за Националната здравствена служба.