Tesla дефинитивно ја развива следната генерација на својот долгоочекуван електричен модел Roadster со цел да го направи „најдобар“ и „малку повеќе од автомобил“, изјави потпретседателот за инженерство на возила Ларс Морави.
Кога беше прашан за новиот Roadster, Морави рече дека тој „дефинитивно е во развој“ и дека тимот го разговарал со основачот и извршен директор на компанијата, Илон Маск.
Морави, исто така, рече дека тимот на Tesla „се подготвува за супер кул демонстрации“. Порано овој месец, Маск најави „епска демонстрација“ за крајот на годината, откако тимот за инженерство на возила му ги презентираше иновациите на извршниот директор на Tesla.
„Мислам дека ќе биде неверојатно“, рече Морави.
Потсетуваме дека Маск напиша на X кон средината на месецот: „Тукушто го напуштив дизајнерското студио на Tesla. До крајот на годината ќе видите епска демонстрација, најдобрата досега“. Сепак, тој не откри за каков производ станува збор.
Морави рече дека тимот поминал многу време во текот на изминатите неколку години размислувајќи за тоа што направиле досега и зошто, и што би го направило автомобилот одличен и возбудлив, најдобар за возачите.
„Tesla Roadster мора да биде најдобар и ние го правиме сè подобар и подобар“, додаде Морави, откривајќи дека „Маск бил малку возбуден“ откако на тимот му била прикажана демонстрацијата.
„Тоа е малку повеќе од само автомобил. Минатата недела му покажавме на Илон неколку одлични демонстрации, кои се поврзани со технологијата на која работиме. Тој беше возбуден“, откри тој.
Во февруари, Морави рече дека Маск му наредил на тимот да оди „чекор понатаму“ и дека тимот сфатил дека може да направи повеќе отколку што претходно мислел.
Морави се приклучил на Tesla во февруари 2010 година како виш инженер за дизајн и развој на шасии. Тој бил унапреден во потпретседател за инженерство на возила во 2019 година, откако имал пет различни улоги во рамките на дивизијата.