Неофицијални вести од Јапонија велат дека сегашната генерација на Supra нема да биде последна, но според сите сметки ќе биде последна со мотор со внатрешно согорување.
Гласините велат дека името Supra ќе живее, но како електричен спортски автомобил. Сепак, пред тоа да се случи, се очекува актуелната генерација да добие врвна верзија со цел на соодветен начин да се збогува со бензинскиот мотор.
Двете гласини доаѓаат од Best Car Web. Ултимативната Supra од сегашната генерација наводно би можела да има бензински мотор со дури 542 КС. Може да го носи и префиксот GRMN (Gazoo Racing, tuned by the Meister of the Nürburgring) и треба да биде последниот модел на шасијата А90, чие производство завршува во 2025 година.
После тоа, следната генерација на Supra би била електрична. Ова го навести главниот инженер Тецуја Тада уште во 2019 година. Електричната Supra (A100) би доаѓала со погон на задните тркала, а би имала 444 до 493 КС.
Новиот двосед, наводно, ќе има форма на спортски автомобил со среден мотор, бидејќи EV платформата ќе овозможи слобода на дизајнот.