Американскиот претседател Доналд Трамп изјави дека „апсолутно“ би размислил повторно за бомбардирање на нуклеарните објекти на Иран доколку смета дека е потребно. „Апсолутно, апсолутно, апсолутно“, им рече Трамп на новинарите во брифингот во Белата куќа кога беше прашан дали би размислил за бомбардирање на земјата доколку идните разузнавачки извештаи укажат на загрижувачки заклучок за збогатувањето на ураниум на Иран, објави „Си-Ен-Ен“.
Трамп рече дека не верува оти Иран би можел „да се врати на нуклеарно оружје во скоро време“, по американските напади врз неговите нуклеарни објекти минатиот викенд. Тој додаде дека не е загрижен за тајните нуклеарни локации на Иран кога беше прашан за можноста, сугерирајќи дека земјата засега е повеќе фокусирана на преживување.
„Можам да ви кажам, тие се исцрпени. И Израел е исцрпен. И работев со двете страни, и двете сакаа да го завршат тоа. Направивме одлична работа. Но, тие се исцрпени. Последното нешто за кое размислуваат во моментов е нуклеарното оружје. Знаете за што размислуваат? Тие размислуваат за утре, тие се обидуваат да живеат“, рече Трамп, според „Танјуг“.
Тој денес повтори дека „ништо не е поместено“ од нуклеарните постројки на Иран и дека збогатениот ураниум не е отстранет пред нападите на САД врз иранските нуклеарни постројки.
„Не верувам дека тие наскоро ќе се вратат на нуклеарна енергија. Потрошија над трилион долари за нуклеарна енергија, а никогаш не ја активираа, и ништо не е поместено од локацијата“, рече Трамп на прес-конференцијата во Белата куќа.
Тој го повика врховниот лидер на Иран да „ја каже вистината“ откако ајатолахот Али Хамнеи прогласи победа над Израел и САД во четврток. „Видете, вие сте човек со голема вера, човек кој е многу почитуван во оваа земја. Мора да ја кажете вистината. Бевте победени до крај, а Израел беше победен. Двете земји беа победени и време беше да се стави крај на тоа“, рече Трамп.
Трамп рече дека двете страни ја искористиле својата 12-дневна војна за да „ја изнесат омразата“. „Многу омраза, многу омраза. Би било одлично ако таа омраза не постоеше, но последното нешто за кое размислуваат во моментов е нуклеарно оружје“, заклучи американскиот претседател.