Американскиот претседател Доналд Трамп тврди дека Кина е многу посилно погодена од американските царини од 54 отсто отколку што Америка ќе биде погодена од кинеските царини од 34 отсто кои стапуваат на сила на 10 април.
Трамп на својата социјална мрежа „Truth Social“ напиша дека Кина и многу други земји „се однесувале лошо“ кон САД, но дека Америка сега ќе победи во, како што рече, економската револуција.
Тој посочи дека работните места сега се враќаат во САД и дека веќе има пет билиони долари инвестиции.
Трамп оцени дека нема да биде лесно, но дека крајниот резултат ќе биде историски и дека неговата стратегија ќе се реализира: „Да ја направиме Америка повторно голема“.
Кина соопшти дека во петокот поднела формална жалба до Светската трговска организација (СТО) поради новите американски царини, велејќи дека мерките ги прекршуваат правилата на организацијата и дека бара консултации за ова прашање.
Секретаријатот на СТО потврди за Ројтерс дека добил барање за консултации од постојаната мисија на Кина во организацијата.
Доколку не се најде решение во рок од 60 дена, Кина би можела да побара од телото за решавање спорови со седиште во Женева на СТО да донесе одлука за случајот.
Во петокот, Кина објави дека ќе воведе одмазднички дополнителни царини од 34 отсто за увоз на стоки од САД.
Во четвртокот Кина го повика Вашингтон веднаш да ги укине најновите царини за увоз на кинески стоки, пренесува Танјуг.
Кинеското Министерство за финансии во петокот објави дека ќе воведе царини од 34 отсто за сите стоки увезени од САД почнувајќи од 10 април.
Министерството, исто така, ја критикуваше одлуката на Вашингтон да воведе 34 отсто од дополнителните реципрочни тарифи за Кина, со што вкупните американски царини за Кина се зголемија на 54 отсто.