Американскиот претседател Доналд Трамп изјави дека неговото присуство во Белата куќа, односно како претседател на Соединетите Американски Држави, спречило избувнување на шест големи војни низ целиот свет, вклучувајќи потенцијален вооружен конфликт меѓу Индија и Пакистан, како и други долгогодишни регионални тензии.
„Да не бев тука, ќе имавте шест големи војни во моментов. Индија ќе се бореше против Пакистан“, рече Трамп во Шкотска, пред средбата со британскиот премиер Кир Стармер, тврдејќи дека неговата администрација одиграла клучна улога во деескалацијата на кризите во неколку глобални жаришта, пишува „Гардијан“.
Како пример, тој го наведе спорот меѓу Тајланд и Камбоџа, за кој посочи дека благодарение на неговата интервенција, вклучително и заканата за прекин на трговските преговори, е постигнато примирје.
Трамп, исто така, посочи на придонесот на неговата администрација во намалувањето на тензиите и поддршката на мировните напори меѓу Руанда и Демократска Република Конго, пренесува Танјуг.