– Преговарачите на американскиот претседател Доналд Трамп вршат притисок врз ЕУ еднострано да ги намали царините за американските производи, предупредувајќи дека без отстапки, блокот нема да напредува во разговорите за да избегне дополнителни „реципрочни“ царини од 20 проценти, објави „Фајненшл тајмс“.
Американскиот трговски претставник Џејмисон Грир се подготвува денес да го информира европскиот комесар за трговија Марош Шефчович дека неодамнешниот документ што го сподели Брисел како дел од преговорите не ги исполнува американските очекувања, објави весникот, повикувајќи се на неименувани извори.
Според весникот, ЕУ барала заеднички договорена рамка за преговори, но двете страни се нашле на спротивставени страни. Ројтерс не можеше да ја потврди оваа информација, пренесува Танјуг.
Европската комисија и Канцеларијата на трговскиот претставник на САД не одговорија на барањето на Ројтерс за коментар. САД воведоа царини од 25% за европски автомобили, челик и алуминиум во март, а 20% за други производи од ЕУ во април.
Потоа ја намалија стапката на 20 проценти до 8 јули, поставувајќи период од 90 дена за преговори за посеопфатен договор за тарифи.
Како одговор, 27-члената ЕУ ги суспендираше своите планови за воведување одмазднички царини за некои американски производи и предложи нулти царини за сите индустриски производи од двете страни.