Трансформаторот кој беше испратен на поправка по оштетувањето настанато во пожарот во ноември 2021г во Србија, пристигна во РЕК Битола, информираат од оваа институција.
Од таму појаснуваат дека постројката ќе биде сместена во трансформаторскиот дел на Термоелектраната и ќе се чува како резерва, што е првпат, како што велат, во своето четириесетгодишно постоење, РЕК Битола да има резервен трансформатор кој би можел веднаш да биде ставен во функција со цел непречено производство на електрична енергија.
„Трансформаторот на Блок 3 на РЕК Битола беше оштетен во пожар кој избувна заради зголемен напон кој дојде во постројката од преносната мрежа. По неуспешните обиди за негово ставање во функција од страна на стручни лица во РЕК Битола, МЕПСО и експерти од Електротехничките факултети во земјава, трансформаторот беше испратен и успешно поправен во фабриката Комел во Србија. Во моментов, Блок 3 работи со новонабавениот трансформатор монтиран во јануари“, се вели во официјалната информација од РЕК Битола.