Samsung го одржа својот настан Unpacked минатата среда каде што претстави нови телефони на преклопување и паметни часовници. Но, настанот помина без ниту една најава или навестување за долгоочекуваниот „трифолд“ (смартфон со екран на троен преклоп).
Сепак, како што објави The Verge, раководителот на мобилниот оддел тврди дека уредот е во подготовка и треба да пристигне „оваа година“.
„Очекувам дека ќе можеме да лансираме трифолд во текот на оваа година“, изјави ТМ Ро, привремен раководител на одделот за Device Experience на Samsung, за The Korea Times. Иако постојат шпекулации дека уредот би можел да се нарече Galaxy G Fold, Ро рече дека конечното име сè уште не е одлучено.
„Во моментов сме фокусирани на усовршување на производот и неговата употребливост, но не сме одлучиле како ќе се вика“, рече Ро. „Како што производот се приближува кон завршување, планираме наскоро да донесеме конечна одлука.“
Ро не беше единствениот од Samsung кој беше спремен да зборува за смартфон со екран на троен преклоп. Android Authority објави изјава од неименуван извршен директор на Samsung кој рече дека хардверот за телефонот е веќе развиен и може да се „пушти во производство“, но дека компанијата прво мора да ја дефинира „целта“ на новата форма на уред.
„Го имаме трифолдот веќе некое време, тој е дизајниран и сè“, рече изворот. „Значи, тоа не е нов концепт за нас. Она што го дискутираме е неговата исплатливост. Кога велам исплатливост, мислам – дали воопшто има побарувачка за овој облик на уред?“
Samsung претходно наговести за овој уред за време на настанот Unpacked во јануари. Откако анимации за него се појавија во датотеките за интерфејсот One UI 8, имаше надеж дека ќе биде претставен на настанот од минатата недела, каде што беа лансирани Z Fold 7, Z Flip 7 и серијата Watch 8. Засега, Huawei Mate XT останува единствениот „трифолд“ на пазарот.
Засега не се знае многу за овој уред на Samsung, но според гласините, тој треба да има голем екран од приближно 10 инчи и секундарен екран од околу 6,5 инчи.
Според некои медиуми, првата генерација ќе биде достапна исклучиво во Јужна Кореја и Кина, а се споменува и почетна цена од дури 3000 долари. Исто така, постојат загрижености за наводниот капацитет на батеријата, кој можеби нема да надмине 5000 mAh – што би можело да биде проблематично за уред со толку големи екрани.
Сите овие информации во моментов се базираат на неофицијални извори и гласини и треба да се земат со резерва.