Тројца загинати и девет се повредени при уривање на хангар на аеродром во Ајдахо

Три лица загинаа, а девет се повредени синоќа откако се урна хангар во изградба на аеродромот во градот Бојси во американската држава Ајдахо, јавуваат американските медиуми.

Според полицијата, пет лица се во критична состојба.

Хангарот, како што се наведува, бил во приватна сопственост.

На прес-конференција, противпожарната служба соопшти дека се чини дека уривањето на зградата предизвикало и пад на кранот, но тие сè уште ја истражуваат причината.

„Вечерва дојде до катастрофално уривање на метална конструкција на градилиштето. Тие кои први реагираа нашле ужасна сцена и вредно работеа на обезбедување и спасување на жртвите“, рече шефот на одделението Арон Хамел.

Официјални лица велат дека немало пречки во сообраќајот на аеродромот.