На денешниот онлајн состаноок на Министерката за образование и наука, Мила Царовска и директорите на основните и средни училишта беше заокружено првото полугодие во рамки на учебната 2020/21 година.
Сепак, на овој состанок директорите оценуваат дека се постигнати резултатите иако беше вонредна состојба и иако на почетокот се пружаше отпор кон онлајн наставата. Според нив, хибридниот модел дал успешни резултати.
„Со над 90 % ученици коишто успешно следеа онлајн настава, со помалку од 1 % активни случаи на Ковид-19 кај наставниците и учениците кои посетуваа настава со физичко присуство и со редовна динамика на емитување на часови на македонски и албански јазик на Националната телевизија слободно можеме да кажеме дека успешно го заокруживме првото полугодие. Наставниот материјал е поминат според предвидените скратени програми, а учениците се оценети“, посочија директорите на состанокот.
Министерката Царовска потенцираше дека со хибридниот модел на настава: онлајн, со физичко присуство и со емитување на часови на телевизија се постигна континуитет во наставата.
„Огромна благодарност до директорите, наставниците, учениците и родителите коишто со силна посветеност и ангажман направија се успешно да се реализира наставата во услови на пандемија“, истакна Царовска.