Денеска избувна пожар на одделот за интензивна нега во египетска болница каде се лекуваат пациенти со ковид-19, во кој, според претходните потврди, починале седум пациенти заболени од коронавирус.
Локалната полиција соопшти дека несреќата се случила во приватна болница во Обур, предградие на главниот град Каиро, а најмалку пет други лица биле повредени во пожарот, пренесува Ројтерс.
Пожарникарите успеаја да го локализираат и изгаснат пожарот, а весникот „Ал-Ахрам“ објави дека според првите резултати од истрагата, за пожарот е виновен краток спој на електричните инсталации.
Египет забележува нагло зголемување на потврдените случаи на коронавирус, принудувајќи ја владата повторно да ги отвори повеќето од своите болници посветени на лекување и изолација на пациенти со КОВИД-19.
Министерството за здравство потврди дека најголемиот дневен број на пациенти со коронавирус, 1.113, е потврден во петокот, заедно со 49 смртни случаи.