Премиерот на Црна Гора, Здравко Кривокапиќ, изјави дека новата Влада прими една од најповолните понуди при издавање на државни обврзници на меѓународниот пазар во износ од 750 милиони евра. Министерот за финансии посочува дека со ова задолжување земјата избегнала банкрот. Кривокапиќ на прес-конференцијата објасни дека новото задолжување е најдобрата опција во овој момент.
Тој изјави дека постојат три модели според кои тие можат да дејствуваат.
„Еден модел е да се продава државен имот, претходната влада тоа го правеше трајно. Нема ниту еден агол на Црна Гора што е вреден, а да не беше продаден“, рече црногорскиот премиер.
Вториот начин, како што наведе, е задолжување со соодветни заеми, додека третиот е моделот на обврзници.
„Најважниот модел што може да се реализира е оној што го избравме. Тоа е издавање на обврзници од типот Б и добивме една од најповолните понуди и успеавме да го реализираме тоа“, рече Кривокапиќ.
Министерот за финансии и социјална помош, Милојко Спајиќ, рече дека тие 750 милиони евра и даваат на Црна Гора две години мир, за да има фискална и финансиска стабилност.
Тој рече дека Црна Гора вчера избегна банкрот.
„Ова е далеку најниска каматна стапка за Б рангирана земја. Граѓаните мора да го знаат тоа“, рече Спајиќ.
Тој посочи дека реагирале пред почетокот на 2021 година, за да не западнат во должничка криза.
„Долгот доспева во март. Ако се обидеме да издадеме обврзница следната година, првото нешто ќе биде цената да биде многукратно поголема, а заштедите да бидат околу 100 милиони евра“, рече Спајиќ.
Изјави дека ќе ги рефинансира старите од новиот заем, кои, како што рече, се многу неповолни.
„Тие пари ќе бидат инвестирани во иднината на Црна Гора. Ова беше единствената присилна мерка, немавме опции, единствената оптимална мерка“, рече Спајиќ.