До неодамна беше можно да се влезе во кафулињата и кафеаните во Подгорица без доказ за вакцинација. По усвојувањето на новите мерки, претседателот на Здружението на угостители на Црна Гора, Никола Буздован, посочи дека бараат од властите да ги ревидираат мерките и дека проблемот е што тие ќе останат без работна сила.
Иако новите мерки на Институтот за јавно здравје (ИЈЗ) предвидуваат дека влезот во угостителските објекти е возможен само со доказ за целосна вакцинација, или примена прва доза вакцина против коронавирус, тоа вчера не се применуваше во рестораните и кафулињата во Подгорица, пренесува „Вијести“.
Во локалите можеше да се влезе без контрола, некои дури и не знаеја за новите мерки, а Здружението на угостители на Црна Гора побара од надлежните институции до понеделник да ги сменат новите епидемиолошки мерки, кои се планираат да важат до 20 август.
Претседателот на Здружението, Никола Буздован, посочи дека бараат надлежните институции да ги разгледаат измените.
„Нашиот став е дека ќе почекаме до понеделник во 15 часот, кога е закажан состанок на Здружението, на кој ќе се донесе одлука за нашите следни чекори“, рече Буздован за агенцијата Медиабиро.
Тој како проблем посочи дека голем број вработени во угостителството не биле вакцинирани.
„Се наоѓаме во ситуација кога е многу тешко да се најде работник, а сега имаме ситуација кога треба да бараме вакцинирани луѓе. Всушност, ние остануваме без работна сила “, рече Буздован.
Според него, угостителите ќе имаат тешко време со работата, особено што сезоната во моментов е во полн ек.
Тој рече дека гостите почнале да прашуваат синоќа дали можат да влезат.
„Ги пуштивме гостите пред две ноќи, но денес не можеме да дозволиме некој да влезе во нашите угостителски објекти“, тврди Буздован.
Буздован спомена дека угостителите биле и иницијатори на кампањата за важноста на вакцинацијата.
„Свесни сме и за епидемиолошката состојба во нашата земја, но при донесување на нови мерки, беше потребно да прашаме како можеме да легитимираме некого при влегување во нашиот објект“, рече Буздован.
Тој побара да му се објасни како да побара потврда од луѓе на кои им бил дозволен влез во Црна Гора без никаква потврда.
„Најважното прашање е зошто ова важи само за угостителски објекти во затворен простор“.
Буздован посочи дека Здружението смета дека ова е дискриминација, особено во време кога се вакцинирани само 35% од населението, „и кога постарата популација што најмалку ги користи нашите услуги, претежно е вакцинирана“.
Во последните 24 часа, во Црна Гора се регистрирани 142 случаи на коронавирус, а анализирани се 2.343 примероци.
Присуството на вирусот, како што соопшти ИЈЗ, е забележано кај 125 граѓани на Црна Гора и 17 туристи.