Турција обвини неколку западни земји за привремено затворање на нивните конзулати во Истанбул од безбедносни причини, обвинувајќи ги дека водат „психолошка војна“ и се обидуваат да ја уништат турската туристичка индустрија.
Германија, Холандија и Велика Британија неделава ги затворија своите конзулати во турскиот град.
Германската амбасада како причина го наведе „ризикот од можни напади по инцидентите со палењето на Куранот во некои европски земји“.
САД и некои други земји издадоа предупредувања за патување во кои ги повикуваат граѓаните да бидат внимателни.
Турскиот министер за внатрешни работи Сулејман Сојлу рече дека затворањето на конзулатот и предупредувањата за патување се дел од „западниот заговор“ за да се спречи турскиот туристички сектор да се опорави од пандемијата на коронавирус.
„На денот кога ја објавивме нашата цел да привлечеме 60 милиони туристи, во време кога пристигнаа 50,5 милиони туристи и остваривме 46 милијарди долари приход од туризмот, тие се на работ да започнат нова психолошка војна против Турција“, смета Сојлу.