Турското тело за заштита на конкуренцијата денеска воведе привремена мерка против Meta платформи, која има за цел да ја блокира размената на податоци меѓу нејзините платформи Instagram и Threads, поради истрагата за можна злоупотреба на доминантната позиција на компанијата на пазарот, објави Ројтерс.
Во декември, турскиот институт за конкуренција отвори истрага против Meta, матичната компанија на Facebook, за можно прекршување на законот за конкуренција преку поврзување на нејзините платформи за социјални медиуми Instagram и поновата Threads.
Органот рече дека привремената мерка ќе остане на сила во очекување на конечната одлука, бидејќи податоците добиени и комбинирани преку овие две апликации може да го „прекршат законот за конкуренција и да предизвикаат непоправлива штета“ на пазарот.
Исто така, турскиот Институт за конкуренција ја казни Meta со 4,8 милиони турски лири (148.000 американски долари) дневно како дел од посебна истрага за известувањето што компанијата го испрати до корисниците за споделување податоци.
Известувањето за споделување податоци помеѓу услугите на Meta – Facebook, Instagram и WhatsApp не дава доволно информации и не е доволно транспарентно, велат од Институтот. Покрај тоа, тој е дизајниран да ги насочи потрошувачите да се согласат за споделување податоци, што според оваа власт не е доволно за да се смират грижите за конкуренцијата.
Портпаролот на Меtа веднаш не ги коментираше одлуките за Ројтерс.