Uber објави стратешко партнерство со три кинески стартапи за автономно возење, Pony.ai, Momenta и WeRide, за да ја внесе нивната технологија во својата платформа и да ја донесе на меѓународните пазари. Фокусот на соработката ќе биде на европските земји и Блискиот Исток, додека Кина и САД ќе бидат исклучени од проектот.
Првото воведување на технологијата на Momenta во роботаксито на Uber се очекува на почетокот на 2026 година во Европа. Во првата фаза од операциите, безбедносните оператори ќе бидат во возилата. Uber го објави партнерството со Momenta на 2 мај, објави „CarNewsChina“.
„Оваа соработка им овозможува на повеќе корисници ширум светот пристап до прифатлива автономна мобилност“, рече Дара Косровшахи, извршен директор на Uber.
Три кинески партнери
Momenta е кинески стартап компанија основана во септември 2016 година, а меѓу нејзините инвеститори се SAIC Motor, General Motors и Toyota. Од 2021 година, снабдува софтвер за автономно возење на премиум брендот IM на SAIC.
Pony.ai е најновата компанија што се приклучува на соработката на Uber, најавувајќи дека првите роботакси со нивната технологија ќе бидат во употреба на Блискиот Исток до крајот на годината. Во почетната фаза, корисниците ќе можат да избираат помеѓу возење со човечки возач и автономно возило со оператор во возилото.
„Партнерството со Uber ја забрзува нашата заедничка мисија: да ја направиме автономната мобилност реалност“, рече Џејмс Пенг, извршен директор на Pony.ai. „Започнуваме на Блискиот Исток, а потоа се прошируваме на други пазари.“
„Партнерството со Pony.ai е уште еден чекор кон глобалното воведување на автономна мобилност“, рече Косровшахи.
Pony.ai е основана од Џејмс Пенг и Тианченг Лу, поранешни инженери во Baidu, во декември 2016 година. Седиштето им е во Гуангжу и имаат лиценци за автономни транспортни услуги во Пекинг и Гуангжу. Меѓу инвеститорите се Toyota и Nio.
WeRide е третиот кинески стартап кој ги нуди своите роботски такси преку апликацијата Uber. Соработката првпат беше објавена во септември 2024 година, а денес беше потврдено дека нивната флота во Абу Даби ќе брои 50 возила до средината на 2025 година. „Uber и WeRide планираат да го прошират своето присуство во нови градови секоја година, со цел да покријат 15 градови во следните пет години – вклучувајќи ги и европските.
Чекор напред во воведувањето на роботакси
WeRide е основана во 2017 година во Гуангжу, а меѓу инвеститорите се Bosch, Nvidia и BlackRock. Компанијата ја води Тони Хан, поранешен раководител на одделот за автономно возење во Baidu. WeRide има лиценци за автономно возење во Кина, САД, Обединетите Арапски Емирати и Сингапур.
Оваа соработка означува уште еден голем чекор кон глобалната имплементација на автономни возила, бидејќи автомобилската индустрија сè повеќе се потпира на софтверски решенија и напредна вештачка интелигенција.