Украинските сили можеби го погодиле најновиот руски систем за воздушна одбрана С-500 користејќи ракети АТАКМС испорачани од САД, објави украински новинар.
„Се известува дека најновиот руски систем за противвоздушна одбрана С-500 бил уништен со ракети АТАКМС“, објави украинскиот новинар Андриј Цаплиенко на својот канал Телеграм, без да прецизира кога и каде е уништен системот.
Генерал-полковник Кирило Буданов, шеф на воената разузнавачка агенција на Украина, на 12 јуни изјави за украинските медиуми дека Русија распоредила компоненти на противвоздушниот ракетен систем С-500, познат како Прометеј, во анектираниот Крим. Се проценува дека Русија би можела да има вкупно четири такви системи.
Руските медиуми го опишуваат С-500 како нова генерација руски противвоздушни ракетни системи, способни да уништуваат балистички и аеродинамички цели. Поранешниот руски министер за одбрана Сергеј Шојгу во април изјави дека првите примероци ќе им бидат доставени на руските војници оваа година, пишува Newsweek.
Сидарт Каушал, научен соработник во лондонскиот Royal United Services институт, изјави за Newsweek дека Русија моментално има еден активен полк кој користи С-500. Ова сугерира дека има два баталјони со по два системи за противвоздушна одбрана, што е вкупно четири.
Во последните неколку недели, украинските сили се чини дека ги засилија нападите врз руските системи за воздушна одбрана, пишува Институтот за проучување на војната.