Украинскиот државен центар за стратешки комуникации објави дека Белорусија денеска би можела да започне инвазија на Украина по средбата во Москва меѓу рускиот претседател Владимир Путин и белорускиот лидер Александар Лукашенко, пренесува The Guardian.
Според прелиминарните податоци, белоруските трупи би можеле да бидат вовлечени во инвазијата на 11 март во 21 часот, се вели во соопштението на центарот.
Украинското воздухопловство соопшти дека во 14.30 часот по локално време државната гранична служба добила информација дека руски авион полетал од пистата во Белорусија, преминал во украинскиот воздушен простор и потоа отворил оган врз Копани, село во Белорусија, пренесе Ројтерс.
„Ова е провокација. Целта е да се вовлечат вооружените сили на Република Белорусија во војна со Украина!“, изјави командата на украинските вооружени сили преку онлајн соопштение.
Украинската армија тврди дека цел на оваа операција биле уште две белоруски населби.