Тесла се соочува со нов глобален проблем – сè поголем број возачи кои се обидуваат да го заобиколат системот и бесплатно да користат напредни функции за автономно возење.
Во последните месеци, постои тренд на хакирање на возилата на Тесла со цел да се активира системот за целосно самостојно возење (FSD) без плаќање, дури и во региони каде што оваа технологија сè уште не е официјално достапна.
Станува збор за мали уреди, слични на USB мемории, кои можат да се купат за околу 500 евра. Тие се поврзуваат со системот на возилото и овозможуваат заобиколување на регионалните ограничувања, дозволувајќи им на возачите нелегално да отклучуваат автономни функции.
Проблемот не е ограничен само на еден пазар – извештаите доаѓаат од Европа, но и од Јужна Кореја, Кина и Турција, што го натера Тесла брзо да реагира.
Тесла сега трајно го оневозможува системот за автономно возење на возилата за кои утврдува дека се модифицирани. Со ова, тој сака да спречи понатамошна злоупотреба и да испрати јасна порака до корисниците. Покрај тоа, на сопствениците на вакви возила им се испраќаат предупредувања во кои истакнуваат дека може да го изгубат правото на гаранција.
„Го задржуваме правото да одбиеме какви било гарантни поправки ако уредот предизвикал штета на возилото“, соопшти Тесла.
Во некои земји ситуацијата е уште посериозна. Во Јужна Кореја, властите предупредија дека употребата на вакви уреди е кривично дело, што значи дека возачите може да се соочат со правни последици.
Сето ова покажува колку сериозно производителите на автомобили пристапуваат кон безбедноста и контролата на своите системи, особено кога станува збор за автономно возење.
Во меѓувреме, развојот на технологијата продолжува. Во некои европски градови веќе се тестираат нови сообраќајни решенија, како што се семафори со бело светло, кои се специјално наменети за возила со автономни системи.
Но, едно е јасно – обидите за заобиколување на системот би можеле скапо да ги чинат возачите.