Претседателката на Европската комисија Урсула фон дер Лајен изјави дека одлуката на Финска да ја затвори границата со Русија поради приливот на мигранти е безбедносно прашање што треба да го разгледа целата Европска унија.
Урсула фон дер Лајен денеска го посети граничниот премин Лапенранта со финскиот премиер Петер Орп.
„Сите знаеме како Путин и неговите сојузници ги инструментализираат мигрантите за да ја тестираат нашата одбрана и да се обидат да не дестабилизираат“, рече Урсула фон дер Лајен за време на обиколката на границата.
Таа додаде дека Путин сега ја има Финска во фокусот, поради „цврстата поддршка“ на таа земја за Украина, која беше нападната од Москва пред повеќе од две години, и поради нејзиното пристапување во НАТО.
„Не се работи само за безбедноста на Финска, туку и за безбедноста на Европската унија. Ние сме во ова заедно“, рече таа.
На 4 април, Финска одлучи да го продолжи затворањето на граничните премини кон Русија „до понатамошно известување“ поради, како што објави владата, високиот ризик од организирана миграција оркестрирана од Москва.
Финската влада затвори осум од девет гранични премини со Русија.
Единствениот што остана отворен е наменет само за железнички сообраќај, а таму одат претежно товарни возови.