Велика Британија распореди дополнителни 1.000 војници низ Блискиот Исток по нападот на Хамас врз Израел на 7 октомври, изјави високиот претставник на британското Министерство за одбрана Џејмс Хепи во обраќањето пред парламентот.
Бројот на британски војници распоредени на Блискиот исток е значително поголем од 600-те што Грант Шапс, британскиот министер за одбрана, ги спомна во вчерашното обраќање пред британските парламентарци, но се верува дека тој погрешно претставил постара сума која не го покрива целосно присуството на британската морнарица во регионот на Блискиот Исток, пренесува британскиот весник „Гардијан“.
Одговарајќи на прашање на опозицискиот лабуристички министер за одбрана во сенка Џон Хили, Шапс исто така потврди дека персоналот на британските сили бил преместен во Тел Авив, Бејрут и Јордан за да помогне во заштитата на британската војска и цивилите.
Добро упатени извори во Министерството за одбрана на Обединетото Кралство денеска соопштија дека тие се британски офицери за врска со израелските одбранбени сили кои имаат задача да изготват планови за итна евакуација и други планови во случај на поширока војна која би можела да го вклучи Хезболах, а можеби и Иран. .
Истите извори нагласија дека не станува збор за британски војници подготвени за борбени активности.