Американскиот потпретседател Џеј Ди Венс изјави дека европските сојузници на Соединетите Американски Држави направиле значително повеќе отстапки кон Вашингтон во врска со Гренланд отколку што тоа јавно го признаваат.
„Дефинитивно добивме многу повеќе отколку што имавме на почетокот“, изјави Венс во интервју за подкастот Megyn Kelly Show, оценувајќи дека идниот договор за Гренланд, најавен минатиот месец од американскиот претседател Доналд Трамп, ќе биде во корист на САД, пренесе BBC.
Изјавите на Венс доаѓаат во период на засилени тензии поради стравувањата дека Вашингтон би можел да преземе и поагресивни чекори кон Данска, членка на НАТО, со цел да воспостави поголема контрола врз полуавтономниот арктички остров. Трамп во повеќе наврати тврдеше дека Гренланд е клучен за одбраната од потенцијални закани од Русија и Кина.
Иако Данска и властите во Гренланд јасно порачаа дека не доаѓа предвид откажување од суверенитетот, Венс истакна дека САД веќе имаат значајно присуство на островот. Повеќе од 100 американски војници се постојано стационирани во американската воена база на северозападот на Гренланд, која функционира уште од Втората светска војна, а постојните договори ѝ дозволуваат на Америка да распореди онолку сили колку што смета за потребно.
Венс не прецизираше што точно опфаќа планот на Трамп, но повторно нагласи дека Русија и Кина имаат стратешки интереси кон регионот. Тој оцени дека САД го носат главниот товар во заштитата на глобалниот систем за противракетна одбрана, од кој корист имаат и европските сојузници, без притоа да добиваат соодветен бенефит.
„Ако САД го штитат системот од кој зависат и други, тогаш логично е од тој договор да имаме и конкретна корист“, рече Венс, алудирајќи дека тоа би можело да вклучува и пристап до природните ресурси на Гренланд.
Американскиот потпретседател ги обвини европските сојузници за, како што рече, дволичност во односите со Вашингтон. „Приватно се многу пријателски и подготвени на бројни отстапки, а јавно нè критикуваат. Тврдењата дека не направиле никакви прилагодувања едноставно не се точни“, порача Венс.