Претседателот на Достоинство, Стојанче Ангелов, вечерва повторно ќе оди во МРТ за да им каже на директорите и уредниците дека како јавен сервис имаат обврска да ги објават снимките што ги презентираше опозицијата.
– Ги повикувам сите граѓани во 19 часот да влезем внатре и да ги принудиме да го пуштат она што во секоја нормална држава се должни да го пуштат, а тоа се разговорите, што со недели наназад, ги објавува лидерот на опозицијата, рече Ангелов пред споменикот на бранителите во „Жена парк“.
Тој рече дека за оваа држава дал 4 литри крв и никогаш нема да дозволи никакви активности кои се на штета на македонските граѓани
– Луѓето од Достоинство нема да применат никакво насилство, дури и да се обидат да ни уфрлат некои што ќе се обидат да провоцираат насилство, ние самите ќе ги совладаме и ќе ги предадеме на полицијата, рече Ангелов
Тој барал средба со главниот уредник Петревски кој му ветил дека ќе се сретнат, но дотогаш членовите и симпатизерите на Достоинство ќе влегуваат во МРТ со барање да се пуштат снимките.
– Ние ги поддржавме барањата за оставка на оваа влада, за оставка на јавниот обвинител и за оставка на раководството на МРТ, кое веќе доцни, зашто досега требаше да си даде оставка и воедно да ги потсетам дека и кривично ќе одговараат и некој од нив ќе лежи во затвор. Ова им е последна шанса да се искупат и во согласност со законот за кривична постапка да се спогодат со јавниот обвинител затоа што вршат тешко кривично дело – злоупотреба на службена должност. Ние, македонските граѓани ги плаќаме да ја информираат јавноста, а не да го перат мозокот на граѓаните, рече Ангелов.