Мистериозни експлозии се случија во понеделникот во две руски воздушни бази далеку од линиите на фронтот, што ја зголемува можноста Киев да најде начин да ги гаѓа руските бомбардери со долг дострел кои се користат во нападите врз инфраструктурата на Украина.
Руските медиуми и видеата објавени на социјалните мрежи покажуваат дека во понеделникот рано наутро се случила експлозија во воздухопловната база Енгелс-2 во руската област Саратов, во која се сместени бомбардери Ту-95 вклучени во напади со крстосувачки ракети врз Украина.
Втората експлозија се случила во воената воздухопловна база во близина на градот Рјазан, на помалку од 200 километри југоисточно од Москва. Три лица загинаа, а пет се ранети по експлозијата на танкерот, јавија руските државни медиуми. Базата е дом на бомбардери со долг дострел Ту-95 и Ту-22М.
На видео снимката од експлозијата се гледа како излив на оган го осветлува ноќното небо. Локалните жители известија дека звукот од експлозијата се слушал на километри.
Gasoline tanker reportedly exploded on an airfield near Ryazan, Russia. Three people dead, six wounded.
Reasons for explosion are not reported. pic.twitter.com/Wv2sEc7vrl
— Anton Gerashchenko (@Gerashchenko_en) December 5, 2022
Причината за двете експлозии не е потврдена, пишува „Гардијан“.
Меѓутоа „База“, руски медиум со извори во безбедносните служби, објави дека рускиот аеродром во Енгелс бил нападнат од залутана муниција која ја погодила пистата на аеродромот. „Астра“, друг независен руски медиум, тврди дека во експлозијата биле оштетени два нуклеарни бомбардери Ту-95. Ниту еден не даде извор за нивната информација.
Кремљ објави дека Владимир Путин бил информиран за инцидентите. Локалните власти во регионот на Саратов соопштија дека безбедносните служби ги истражуваат извештаите за експлозија на аеродромот Енгелс.
Извештаите од украинскиот мониторинг од минатата недела сугерираат дека Русија испорачувала крстосувачки ракети до воздухопловната база Енгелс и преместувала авиони во воздухопловната база Рјазан како подготовка за нов напад врз Украина.
Не е познато дека Украина располага со муниција што би ѝ овозможила да нападне стотици километри подалеку од линијата на фронтот на конфликтот, иако има извештаи дека таквите беспилотни летала се во развој.