Израел ја нападна сириската армија на југот од земјата втор ден по ред, тврдејќи дека сака да ја задржи демилитаризирана областа каде што се водат конфликти и да го заштити малцинството Друзи.
Сведок на Ројтерс пријави беспилотни летала и најмалку четири воздушни напади врз градот Свеида, во кој мнозинството се Друзи. Сведокот, исто така, го видел оштетениот тенк и најмалку три мртви лица. Неколку десетици луѓе се убиени во судирите што траат од неделата во тој јужен регион на Сирија.
Насилството ги истакна тешкотиите со кои се соочува привремениот сириски претседател Ахмед ал-Шара во неговите напори да воведе контрола врз областа во близина на сириската граница по соборувањето на сирискиот диктатор Башар ал-Асад во декември.
Шара е охрабрен од подобрувањето на односите со американскиот претседател Доналд Трамп и укинувањето на европските санкции, но неговата влада се бори да се справи со секташките тензии и недовербата меѓу малцинските групи, влошени од масовните убиства на Алавити во март.
Сирија: Израел е целосно одговорен за нападите
Сириското Министерство за надворешни работи објави дека го смета Израел за целосно одговорен за нападите. Министерството вети заштита на сите граѓани, вклучувајќи ги и Друзите. Владата објави дека земјата ќе дејствува против секој за кого е докажано дека извршил кривично дело, „без оглед на нивниот ранг или позиција“.
Израел, наведувајќи ја заштитата на Друзите како мотив, неколку пати ја нападна Сирија. Тој ги изврши последните напади откако влијателниот друзски шеик Хикмат ал-Хаџри ги обвини владините сили за кршење на прекинот на огнот и ги повика борците да се спротивстават на „варварскиот напад“.
Сирискиот министер за одбрана Мурхаф Абу Касра објави по изјавата на ал-Хаџри дека е на сила целосно прекин на огнот и дека владините сили ќе пукаат само како одговор на нападите.
Абу Касра додаде дека на воената полиција ѝ е наредено да биде распоредена во Свеида за „контрола на однесувањето на армијата“ и да ги гони прекршителите на законот, објави државната новинска агенција САНА.
Израел: Тоа е кршење на демилитаризацијата
Репортер на Ројтерс видел мажи во униформи како палат и ограбуваат куќи и продавници палат продавница што продава алкохол. Друзите се малцинска етно-религиозна група чија религија е гранка на исламот и има следбеници во Израел, Сирија и Либан.
Израелскиот премиер Бенјамин Нетанјаху и министерот за одбрана Израел Кац изјавија дека ѝ наредиле на израелската војска да ги нападне „режимските сили“ и оружјето донесено во Свеида за борба против Друзите.
Распоредувањето на владините сили е кршење на политиката за демилитаризација, предупредија Израелците, повикувајќи го Дамаск да се воздржи од доведување сили што претставуваат закана за Израел и јужна Сирија.
„Израел е посветен на спречување на нанесување штета на Друзите во Сирија поради длабокиот братски сојуз со нашите граѓани Друзи во Израел“, објавија Нетанјаху и Кац.