Гитаристот на Ролинг Стоунс, Кит Ричардс, сними роденденска честитка за својот колега од бендот Мик Џегер, кој во средата наполни 80 години.
Џејгер и Ричардс – т.н „блескавите близнаци“, пријатели од детството и основачите на најголемиот рокенрол бенд на сите времиња – се родени во истата година, а гитаристот на „Rolling stones“ треба да го прослави својот 80-ти роденден во декември.
По повод роденденот на Џегер, Ричардс на својот Инстаграм профил објави видео на кое накратко свири на клавир, а потоа упатува трогателна честитка до својот рокенрол другар.
„Драг Мик, ајде да продолжиме да си го кажуваме ова долго време – Среќен роденден Мик, уживај во него и јави ми се да ми кажеш какво е чувството“, рекол Кит, пренесе „Индипендент“.
И колегата од бендот Рони Вуд му испрати честитка на Џегер на Твитер. „Среќен 80-ти роденден“, напиша Вуд и сподели неколку заеднички фотографии со Џегер.
Џегер на социјалните мрежи им се заблагодари на сите за честитките.
Лени Кравиц, Најл Роџерс и Шон Оно Ленон, меѓу другите, му го честитаа роденденот на пејачот на Ролинг Стоунс.