Главниот град на Австрија за прв пат ќе го организира „Климатското биенале“, од 5 април до 14 јули годинава.
Како што соопшти Канцеларијата на Град Виена во Белград, во текот на тие денови низ Виена ќе бидат организирани изложби и работилници на тема клима.
Централната манифестација ќе биде во галеријата „Kunst Haus Wien“, а првата групна изложба ќе се вика „Into the Woods“.
Кустосот Софи Хаслингер ќе претстави 16 современи поставки на два ката од музејот, кои ќе се занимаваат со човековото влијание врз состојбата на шумите, нивното уништување од една страна и колективните и симбиотските активности на шумскиот екосистем од друга.
„Климатското биенале е совршена платформа за дискусија за промените на нашата планета“, рече Герлинде Ридл, директорка на галеријата Kunst Haus Wien.
Намерата на овој настан, како што се наведува во соопштението, е да привлече разновидна публика, од светот на уметноста и културата, науката, луѓе од различни градски области, носители на одлуки од политиката и бизнисот, децата и младите, како и луѓе кои најмногу страдаат од климатската криза.
Една од темите на биеналето во иднина ќе биде снабдувањето со храна.
Изложби по повод Светскиот ден на водата во галеријата „Белведере 21“ ќе се занимаваат со последиците од климатските промени.
„Мораме повторно да измислиме многу работи. Ништо не е како што мислевме“, рече Петер Ханке, член на градскиот совет за финансии и укажа на потребата Виена како европска метропола да даде одржлив придонес.