Бројот на посети на глобалната онлајн енциклопедија Википедија се намали за осум проценти на годишно ниво, според блог пост на Маршал Милер, виш директор за производи и основни искуства во Фондацијата Викимедија.
Падот на посетите на Википедија е забележлив по ажурирањето на нејзиниот систем за откривање ботови, кое откри дека дел од претходно „многу високиот“ сообраќај всушност доаѓал од ботови кои се обидувале да избегнат контрола, додека посетите од реални луѓе се значително помали.
Милер објаснува дека падот на посетите е поврзан со промените во начинот на кој луѓето бараат информации.
Генеративната вештачка интелигенција и социјалните мрежи стануваат главен извор на знаење, додека пребарувачите како што е Google сè повеќе им даваат одговори директно на корисниците, наместо да се повикуваат на извори како што е Википедија.
Покрај тоа, помладите генерации сè повеќе ги користат социјалните мрежи за информации и помалку пребаруваат на Интернет за да стекнат ново знаење, објави Tech Crunch.
Фондацијата предупредува дека намалувањето на посетите на Википедија би можело да влијае на бројот на волонтери кои уредуваат содржини и донатори кои ја поддржуваат работата на онлајн енциклопедијата.