Виолина од 18 век, направена од славниот италијански производител на инструменти Антонио Страдивари за време на неговото „златно доба“ ќе се најде на аукција следниот месец, со проценета вредност од рекордни 18 милиони долари.
Конзерваториумот за музика во Њу Ингланд (NEC) ја става на продажба виолината наречена „Јоаким-Ма Страдивариус“, а приходите одат за студентски стипендии, исполнувајќи ја желбата на Си-Хон Ма, музичар кој ја донираше виолината на институцијата.
Аукцијата ќе се одржи на 7 февруари во Њујорк од страна на „Sotheby’s“ како дел од својата недела на аукции на дела од стари мајстори.
„’Страд’ е веќе… како име за виолина… како Пикасо во светот на виолините. Ние ја проценуваме виолината во опсег од 12 до 18 милиони долари, што се вклопува со рекордната цена веќе постигната за Страд“, вели Хелена Њуман, претседателка на европската филијала на Sotheby’s во Лондон, каде виолината е јавно изложена.
Виолините на Страдивари, кои се продаваат за милиони долари, се познати по својата извонредна изработка, а најбарани се од неговото „златно доба“ од 1700 до 1720 година.
Неговата виолина „Лејди Блант“ од 1721 година беше продадена за рекордни 15,9 милиони долари во 2011 година.