Италијанскиот премиер Марио Драги изјави дека ќе се повлече доколку Движењето 5 ѕвезди се повлече од неговата коалиција и ги повика партиите кои го поддржуваат да престанат да поставуваат „ултиматуми“ до неговата влада.
Лидерот на Движењето 5 ѕвезди, поранешниот премиер Џузепе Конте минатата недела поднесе список со политички барања за континуирана поддршка за владата и се закани дека ќе ја прекине поддршката доколку Драги не преземе низа мерки, пренесува „Ројтерс“.
Клучното гласање за доверба за стимулативниот пакет за помош на семејствата и бизнисите да се справат со енергетската криза ќе се одржи оваа недела во Сенатот, но сè уште не е јасно дали Движењето 5 ѕвезди ќе учествува во гласањето или ќе ја напушти коалицијата.
Сакајќи да ги намали тензиите, а по состанокот со синдикатите, Драги рече дека многу од политичките приоритети на Движењето 5 ѕвезди се преклопуваат со владините, но тој предупреди на постојаните барања на коалициските партнери.
„Владата не работи со ултиматуми, со нив ја губи смислата на своето постоење“, рече Драги на прес-конференција, додавајќи дека нема да има желба да остане премиер доколку Движењето 5 ѕвезди се повлече од кабинетот.
Лидерот на Десничарската лига, Матео Салвини, чија партија е најголема во коалицијата на Драги, во јуни изјави дека во септември ќе одлучи дали ќе остане во владата или не.