Турскиот суд ја ослободи поп-ѕвездата Ѓулсен од затвор во домашен притвор додека го чека судењето под обвинение за „поттикнување омраза и непријателство“ поради шегата што ја направила за турските верски училишта.
Минатата недела, 46-годишната кантавторка, чие полно име е Ѓулсен Чолакоглу, беше однесена на сослушување од нејзиниот дом во Истанбул, а оттогаш беше во затвор. Нејзиното апсење предизвика бес на социјалните мрежи и ја продлабочи загриженоста за судството во Турција, чија независност е доведена во прашање од опозициските партии.
Наводите се засноваат на шега што пејачката ја направи за време на концерт во април, каде што рече дека еден од нејзините музичари бил „перверзен“ затоа што посетувал верско училиште.
Постапувајќи по барање на адвокатот на Ѓулсен, судот во Истанбул ја ослободи од затвор под услов да не го напушта својот дом, јави државната агенција Анадолија.
Судот го наведе фактот дека пејачката има мало дете за кое треба да се грижи, дека таа не претставува ризик за бегство и дека веројатно нема да влијае на доказите, наведува агенцијата.
Владините критичари рекоа дека апсењето на пејачката е обид на турскиот претседател Реџеп Таип Ердоган да ја консолидира поддршката меѓу неговите верски и конзервативни поддржувачи пред изборите следната година.
Пејачката претходно стана мета на исламските кругови поради раскошната сценска облека и развиорувањето на ЛГБТ+ знамето на концерт.