Денеска се очекуваат протести низ цела Франција, бидејќи противниците на десничарскиот претседателски кандидат Марин Ле Пен се обидуваат да формираат обединет фронт за да ја спречат да победи во вториот круг од изборите, на 24 април, против актуелниот претседател Емануел Макрон.
Полицијата предупреди на можни инциденти додека демонстрантите се соберат во околу 30 градови, пренесуваат агенциите.
„Екстремната десница повторно се засили во вториот круг од претседателските избори со ниво на поддршка што досега не беше случај. Одбиваме да видиме дека ја освојува власта“, се вели во заедничкото соопштение на Лигата за човекови права.
Десетици други групи за човекови права, синдикати и здруженија потпишаа повик за протест.
„Со отфрлањето на Марин Ле Пен, станува збор за запирање на пристигнувањето на проектот што ќе го уништи владеењето на правото и Социјалдемократската Република и солидарноста што ја браниме секој ден“, се вели во соопштението.
Во центарот на Париз денеска ќе се соберат и демонстранти кои се против Макрон.
Во интервју за ТВ БФМ, истакнатиот член на партијата Национално собрание, Луис Алио, ги критикуваше протестите против екстремната десница.
„Господинот Макрон го подели општеството во последните пет години и многу од овие луѓе протестираа против тоа. Дали навистина мислите дека луѓето се идиоти?, праша тој.
Макрон стана претседател во 2017 година по полесна победа над Ле Пен, кога гласачите го поддржаа, со цел да ја задржи крајната десница надвор од власта.
Овој пат, пак, според британската агенција, тој се соочува со многу потежок предизвик.
Макрон води во анкетите, критикуван за неправилно водење на кампањата пред првиот круг на гласање, а го смени курсот пред вториот круг од изборите на 24 април.
Тој оцени дека политичката програма на Ле Пен е полна со лаги и лажни ветувања, кои, како што рече, ја прикриваат екстремно десничарската агенда што на крајот ќе доведе до излез на Франција од Европската унија.
Според резултатите од анкетата на ИПСОС-Сопра-Стерија објавени во петокот, актуелниот претседател победува во вториот круг од гласањето со 56 отсто од гласовите.
Тој ја доби поддршката од поранешните претседатели Никола Саркози и Франсоа Оланд.
Исто така, како што се наведува, стотина познати и спортски личности му дале поддршка во напорите да се спречи евентуалната победа на Ле Пен.