Германскиот министер за економија Роберт Хабек сака да ја зголеми продажбата на електрични автомобили со специјална понуда. Покрај даночните поволности, на потрошувачите би им се нудел и бонус од 1.000 евра за полнење на возилото, наведува германската агенција dpa.
Хабек се залага купувачите да ги користат средствата за полнење на електрични возила, кои би ги добиле при купување на стари и нови електрични автомобили, на јавно достапни полначи.
Министерот веќе има подготвено план кој неделава беше објавен во германските медиуми. Тоа, исто така обезбедува даночни олеснувања. За купувачите на електрични автомобили со пониски и средни примања би се вовело даночен кредит на одреден дел од набавната цена, слично како и енергетското реновирање на зградите.
Министерството, исто така, размислува за модел на лизинг за да ги направи електричните автомобили достапни за луѓето со ниски приходи.
Покрај пазарот за нови електрични автомобили, планот на Хабек го разгледува и пазарот за користени електрични возила. „За да го стимулираме пазарот на половни автомобили, сакаме да субвенционираме професионални контроли на батерии со 100 евра“, се вели во соопштението.
Порано во Германија се спроведуваа стимулации за купување електрични автомобили, но поради буџетски проблеми тие беа предвреме откажани на крајот на 2023 година.
Поради оваа причина, продажбата на електрични возила во најголемата економија на еврозоната исто така почна да опаѓа – главно поради конкуренцијата од кинеските производители. Компаниите како Фолксваген се најдоа во тешка ситуација поради ова.