Најмалку четири лица загинаа во денешните израелски воздушни напади во јужен Либан, според податоците на либанската цивилна одбрана.
Една жена и нејзините две деца ги загубија животите во напад на куќа во градот Ал Сувејнех, се вели во соопштението. Се додава дека еден човек загинал, а девет лица се повредени во друг израелски напад во пограничниот град Адчит, пренесува Анадолија.
Израелската војска денеска соопшти дека започнала „голем“ бран воздушни напади против Либан.
Ова се случи по ракетниот напад од јужен Либан врз воената база во Сафад на северот на Израел, при што едно лице загина, а седум беа ранети.
Тензиите се високи долж границата меѓу Либан и Израел со повремена размена на оган меѓу израелските сили и Хезболах, во најсмртоносните судири откако двете страни влегоа во војна во 2006 година.
Зголемувањето на тензиите дојде по почетокот на израелската воена офанзива врз Појасот Газа, обвинета за геноцид, во која загинаа повеќе од 28.500 луѓе по прекуграничен напад на Хамас на 7 октомври.