Црногорската агенција за електронски медиуми во саботата забрани емитување на одредени програмски содржини на српската телевизија „Хепи“ поради навреди на Црногорци и пратеници во црногорскиот парламент.
Телевизијата „Хепи“ е национален медиум во Србија, а во Црна Гора се емитува преку кабелски оператори.
Со одлука на Советот на црногорската агенција за електронски медиуми, на црногорскиот пазар се забранети емисиите „Добро утро Србија“, „Викенд“, „Утро“, „Кирилица“ и „После ручек“.
Претседателот на Српската радикална партија и хашки осуденик Воислав Шешељ, за време на гостувањето на телевизија „Хепи“ на 4 јануари, ги навредувал жените од старата црногорска престолнина Цетиње и пратеничката на Социјалдемократската партија Драгиња Вуксановиќ-Станковиќ.
Навредите на Шешељ предизвикаа бројни реакции кај политичките партии и невладините организации во Црна Гора, а СДП најави и тужба против ТВ „Хепи“ за навреди за време на говорот на Шешељ.