Неуспешниот пуч на руската приватна воена група „Вагнер“ минатата недела ја доведува во прашање судбината на огромната мрежа на воени и комерцијални операции на силите низ Европа, Блискиот Исток и Африка.
Еве ги фактите за тоа што прави „Вагнер“ и каде ги спроведува своите операции, според извештајот објавен од новинската агенција „Ројтерс“:
Украина
Вагнер беше распореден во Украина веднаш по почетокот на руската офанзива минатиот февруари. До летото, „Вагнер“ регрутирал илјадници затвореници да се борат со оваа група на првите линии.
До декември, кога презеде водечка улога во битката за Бахмут, американското разузнавање процени дека воената група имала 40.000 регрути затвореници кои се бореле во Украина, иако „Вагнер“ не сакаше да ја коментира таа бројка.
Водачите на групата ја презедоа заслугата за рускиот успех во Бахмут и ја критикуваа редовната руска армија и начинот на кој Министерството за одбрана ја води војната.
Белорусија
Шефот на „Вагнер“, Евгениј Пригожин, пристигна во Белорусија во вторникот, според договорот што го постигна претседателот на земјата, Александар Лукашенко.
Рускиот претседател Владимир Путин рече дека на борците на групата ќе им биде понуден избор да се преселат таму.
Неодамнешните сателитски снимки покажуваат реновирање на полунапуштена воена база во Белорусија, во близина на градот Асиповичи, што покажува дека силите на „Вагнер“ ќе бидат сместени таму.
Сирија
Русија официјално ги започна своите воени операции во Сирија во 2015 година како поддршка на претседателот Башар ал Асад. Таа ги распореди своите воздушни сили од базата Хмејмим и користеше контрактори, вклучително и силите „Вагнер“, во некои копнени операции и во безбедносни улоги.
Американските сили убиле неколку стотици борци на „Вагнер“ за време на конфликтот во Сирија во 2018 година.
Групата ја презеде задачата да го обезбеди нафтеното поле Ал-Шаер, а западните претставници рекоа дека групацијата е сопственик на компанијата „Еуро Полис“, која зема 25 отсто од профитот на неколку нафтени полиња.
Воздушната база Хмејмим оттогаш стана важен центар за глобалните логистички операции на „Вагнер“, како транзитна точка за летови меѓу Русија, Блискиот Исток и Африка преку воздушните бази во Либија.
Либија
„Вагнер“ влезе во Либија во 2019 година со цел да му помогне на пензионираниот генерал Калифа Хафтар во источна Либија да го нападне Триполи за да ја собори меѓународно признатата влада.
Министерството за одбрана на САД во 2020 година изјави дека поддршката на „Вагнер“ за Хафтар очигледно била платена од Обединетите Арапски Емирати.
ОАЕ ја поддржаа позицијата на Хафтар, заедно со Русија и Египет.
Обединетите Арапски Емирати не одговорија на барањето на „Ројтерс“ за коментар кога беа прашани за каква било поврзаност со „Вагнер“.
Тимот за следење на санкциите на ОН во 2020 година соопшти дека „Вагнер“ распоредил околу 1.200 луѓе во Либија.
Американската команда за Африка соопшти дека руски воени авиони ги снабдуваат таму „вагнерците“.
Вагнер управуваше со системи за противвоздушна одбрана и борбени авиони од воздухопловната база Јуфра, јужно од Триполи, каде пристигнаа и некои воени авиони од базата Хмејмим, на кои беа обоени нивните оригинални руски ознаки.
Освен што ги враќаше сириските борци, „Вагнер“ работеше со странски борци од Судан, Чад и други земји.
Иако офанзивата на Хафтар заврши со неуспех и прекин на огнот во 2020 година, Вагнер не ја напушти Либија и остана присутен во Џуфра и во другите воздушни бази на југ и исток, за кои истражувачите велат дека се користат како место за пресрет на други места во Африка.
Инспекторите велат дека „Вагнер“ има деловни интереси во Либија кои вклучуваат производство на енергија и локални мрежи за шверц, и дека членовите на групата се распространети низ важни нафтени полиња.
Централноафриканска Република
Централноафриканската Република е една од најсиромашните земји во светот иако е богата со минерали. Руски платеници, вклучително и членови на „Вагнер“, интервенираа во 2018 година на страната на владата за да ја смират граѓанската војна што беснее од 2012 година.
Рускиот амбасадор во Централноафриканската Република во интервју во февруари изјави дека во земјата има 1.890 „руски тренери“.
Аналитичарите велат дека „Вагнер“ ги добил правата за ископ и контрола на рудникот за злато во републиката.
Оваа недела, САД воведоа санкции на компанија во Централноафриканската Република, заедно со неколку други, вклучително и компанија од ОАЕ.
Се вели дека овие компании биле вклучени во финансирањето на групацијата „Вагнер“ преку нелегални зделки со злато.
Мали
Русија и Мали рекоа дека руските борци таму не биле платеници, туку тренери кои им помагале на локалните сили во борбата против исламистичките милитанти кои воделе 10-годишен бунт.
Лидерите на Мали ја презедоа власта со државен удар во 2021 година и ја доведоа групата на „Вагнер“ откако побараа заминување на француската воена мисија.
Ројтерс во 2021 година дозна дека владата директно склучува договор со „Вагнер“ и плаќа околу 10,8 милиони долари месечно за неговите услуги.
Борците на Вагнер се обвинети за вмешаност во инцидент минатата година во Моура, централно Мали, каде што локалните сили и руските борци наводно убиле стотици цивили.
Судан
Дипломатите и западните земји велат дека „Вагнер“ е вклучен во ископување злато, дезинформации и планови за потиснување на продемократските демонстрации во Судан, додека Русија се обидуваше да влијае на настаните пред и по соборувањето на Омар ал-Башир во 2019 година.
Иако Москва има односи со двете страни во конфликтот што избувна во Судан на 15 април, се верува дека „Вагнер“ ги одржува своите врски со Силите за брза поддршка, а не со војската.
„Вагнер“ негираше дека дејствувал во Судан, велејќи дека неговите членови не биле таму повеќе од две години и немале никаква улога во борбите.
Сепак, Соединетите Држави го обвинија „Вагнер“ во мај дека ги снабдува Силите за брза поддршка со ракети земја-воздух, што помогна да се продолжи вооружениот конфликт што само води до поголем хаос во регионот.