Scout Motors потврди дека ќе ги открие своите први возила од новата генерација на 24 октомври. Американскиот бренд, кој сега е во сопственост на VW, ќе дебитира со концептни верзии на електричен теренец и пик-ап, а во 2026 година ќе следат сериски верзии кои ќе се произведуваат во американската сојузна држава Јужна Каролина.
Потврдата за ова дојде во форма на едноставно тизер видео објавено на социјалните мрежи. Под компасот се појавува стилизирано име на брендот, а под него е текстот што гласи „откријте 24.10.2024 година“.
Тој датум е посебен за љубителите на оригиналниот International Scout, теренски ривал на возила како Ford Bronco и претходник на модерниот SUV. Имено, последниот Scout II е направен во октомври 1980 година, а потоа производството било прекинато поради финансиски проблеми на компанијата International Harvester која ги произведувала автомобилите.
Компанијата со седиште во Илиноис беше реорганизирана и преименувана во Navistar во 1986 година, а VW ги стекна правата за името Scout во 2020 година кога Navistar беше купен од Traton, порано Volkswagen Truck & Bus AG, кој поседува брендови како што се MAN и Scania.
Новата компанија Scout Motors не објави никакви технички детали за своите претстојни производи, но претходно покажа пар скици кои ни даваат поглед на профилите на висок теренец и груб пик-ап.
Дизајнирани да ги „крадат клиентите“ од Rivian, Ford и Jeep, автомобилите ќе бидат изградени во нова фабрика во Блитвуд вредна 2 милијарди долари, која ќе може да произведува до 200.000 возила годишно.