Volkswagen размислува за голем број мерки за намалување на трошоците за својот водечки бренд, вклучително и намалување на платите за 10 отсто и замрзнување на платите за две години, бидејќи се обидува да заштеди 4 милијарди евра, објави весникот Handelsblatt, цитирајќи упатени во компанијата.
Производителот на автомобили е под зголемен притисок да ги намали трошоците во услови на предизвикувачка економска клима. Работниците, пак, го критикуваа раководството дека не претставиле јасна идна стратегија, и покрај ветувањата за нов план во работа.
Според Handelsblatt, раководството на Volkswagen разговарало за неколку потенцијални потези за заштеда на трошоците. Тие вклучуваат ограничување на бонусите, намалување на дополнителните плаќања за годишнини на вработените и истражување на можноста за затворање на некои германски производствени погони.
Портпаролот на Volkswagen одби да коментира за Handelsblatt за тековните преговори со работниот совет на компанијата и IG Metall, моќниот синдикат на металските работници во Германија.
Од почетокот на октомври, менаџментот на Volkswagen има седмично состаноци со претставници на работниците од неговите германски фабрики, анализирајќи каде може да се намалат трошоците и кои модели ќе се произведуваат на секоја локација.
Преговорите за зголемување на платите се водат посебно, според претставник на синдикатот, а следниот формален круг е закажан за 30 октомври.