Германскиот производител на автомобили Volkswagen AG и наследниците на дизајнерот на Beetle, Фердинанд Порше, најголемиот акционер на компанијата, во вторникот соопштија дека водат прелиминарни преговори кои би можеле да доведат до иницијална јавна понуда на легендарниот производител на спортски автомобили – Porsche AG, пренесе Wall Street Journal.
VW вели дека има развиено рамковен договор со Porsche SE кој сè уште бара формално одобрение и од компаниите и од нивните надзорни одбори. Акциите на VW пораснаа за речиси 9% по веста, кога тргувањето беше отворено на берзата во Франкфурт и се тргуваа за околу 188,14 евра.
Котирањето ќе и обезбеди на VW свежи пари за финансирање на агресивната транзиција кон електрични возила, развојот на нови технологии како што се самоуправувачките автомобили и создавањето на нов бизнис за производство на батерии за своите електрични возила. Дискусиите нагласуваат како производителите на автомобили се борат да обезбедат капитал за финансирање на најголемата трансформација во автомобилската индустрија во последниов еден век.
Најавата доаѓа по повеќе од една година шпекулации и интензивни дискусии меѓу главните акционери на VW, меѓу кои се и Porsche Automobil Holding SE, фондот во сопственост на семејствата Порше и Пих, покраината Долна Саксонија, која контролира околу 20% од VW и има посебни права според германскиот „закон за VW“ и влијателниот синдикат IG Metall, кој држи половина од местата во одборот на директори на VW.
Porsche SE ги потврди преговорите и рече дека може да купи акции во Porsche AG во случај на IPO. Луѓе блиски до семејството изјавија во декември дека размислуваат да продадат дел од 53% од акциите во VW за да преземат голем удел во Porsche. Во 2008 година, семејството се обиде да го купи Volkswagen, но откако договорот не успеа, тие го отстапија својот удел во Porsche на Volkswagen.
Porsche е главен двигател на профитот на VW и еден од најпрепознатливите брендови на групацијата. Производителот на спортскиот автомобил 911 и целосно електричниот спортски седан Taycan придонесува со голем дел во профитот на групацијата VW, во која се вклучени и истоимените марки Volkswagen, Audi, Bentley, Lamborghini и други.
Минатата година Porsche продаде 301.915 автомобили и иако ова е мал дел од масовната продажба на автомобили на VW, аналитичарите проценуваат дека само бизнисот со електрични автомобили на Porsche може да чини речиси половина од вредноста на целиот пазар на Volkswagen, кој има капитализација од 108,61 милијарди евра.