Вредноста на германскиот извоз падна за 2,8 отсто на 124,6 милијарди евра во октомври, што е најниска вредност за речиси три години, објави денеска германската Федерална статистичка служба (Дестатис).
Според извештаите, германскиот извоз во земјите од Европската унија е намален за 0,7 отсто во однос на истиот месец, а извозот во земјите надвор од ЕУ за 5,3 отсто.
Извозот во САД е значително намален за 12,2 отсто на месечно ниво, исто како и извозот во Кина за 3,8 отсто и Русија за 9,4 отсто, додека, наспроти тоа, германскиот извоз во Велика Британија е зголемен за 2,1 отсто.
Ако го анализираме десетмесечниот период од јануари до октомври, ќе заклучиме дека вредноста на германскиот извоз паднала за 1,2 отсто на годишно ниво на 1,3 милијарди евра, се наведува на веб-страницата Дестатис.
Генерално, германската индустрија е прилично претпазлива во однос на развојот на бизнисот со странските земји, се вели во посебен извештај на Институтот за економски истражувања IFO во Минхен за ноември.
Најтешко погодена е металната индустрија која очекува значителен пад на извозот, а лошо расположение владее и во автомобилската индустрија и машинското производство. Во хемиската индустрија, позитивните и негативните изгледи се речиси во рамнотежа, додека германските производители на храна и пијалаци се во најдобра позиција и очекуваат раст на извозот.
Компаниите се немирни, но се уште ги чекаат чекорите на новоизбраниот претседател на Соединетите Американски Држави, Доналд Трамп, коментира менаџерот за истражување на IFO, Клаус Волрејбе.