По средбата меѓу претседателот на Србија и претседателот на Република Српска, пред јавноста се обратија Александар Вучиќ и Милорад Додик. Вучиќ изјави „дека денеска е тежок ден за српскиот народ во целина“. Тој рече и дека пресудата против Додик е чудна и бесмислена.
– Оваа пресуда не го покажува само односот кон Додик. Таа пресуда е насочена против Република Српска и против српскиот народ во целина. Дојдов вечерва не затоа што на кој било начин можам да влијаам врз одлуките на раководството на Република Српска. Дојдов да ги поддржам нашите во Република Српска, да му го кажам истото на Милорад Додик, без никогаш никого да загрозам. Јас бев внимателен на секој збор што го кажувам во изминатите 13 години, секогаш внимавајќи да ја потенцирам неопходноста од зачувување на Дејтонскиот договор, интегритетот на Босна и Херцеговина и сè друго. Отсекогаш ми се одмаздувале на најлош можен начин, од физички линч до најбруталните лаги и навреди кои сум морал да ги издржам сите овие години“, рече Вучиќ.
„Дојдов кај претседателот Додик само со две барања, му ги пренесов заклучоците на нашиот Совет за национална безбедност“, додаде Вучиќ.
Тој најави собраниска седница за следниот месец, на која ќе биде поканет да зборува и да се обрати пред пратениците претседателот на Република Српска.
– Ќе разговараме и за потенцијална седница на Советот за безбедност, рече Вучиќ.
Додик вели дека е отворен за дијалог за тоа како Босна да се направи уставна и одржлива за сите.
– Утре ќе повикаме на разговори. Инсистирам на тоа што е наше и што ни го даде Уставот на Босна и Херцеговина и не бараме ништо повеќе. Сметаме дека БиХ може и треба да остане таква. Ништо не ни треба, не не интересира ниту еден сантиметар од Федерацијата, изјави Додик.
Тој објасни дека разговорот е решението.
– Разбираме дека ставот на бошњачкиот народ денес е променет, но нивните лидери мора да им го објаснат тоа, изјави претседателот на Република Српска.
Претседателот Вучиќ вечерва пристигна во Бања Лука по седницата на Советот за национална безбедност со која тој претседаваше. Тој дојде да го поддржи Додик по денешната скандалозна пресуда на Судот на Босна и Херцеговина, со која претседателот на Република Српска беше осуден на една година затвор и шестгодишна забрана од политиката поради наводно непочитување на одлуките на високиот претставник Кристијан Шмит.