Потпретседателот на Владата на Србија во оставка, Александар Вулин, денеска во Москва „искажа благодарност за поддршката на Руската Федерација до легалните и легитимните власти на Република Србија и повторното воспоставување на редот и стабилноста во земјата“ и „го повтори барањето премиерот на Србија, Милош Вучевиќ, да го упати до руската страна за руски специјалци да учествуваат во истрагата за наводната употреба на звучен топ за време на протестот на 15 март во Белград“.
Вулин во денешната официјална посета на Русија за ова разговарал со секретарот на Советот за безбедност на Руската Федерација, армискиот генерал Сергеј Шојгу, соопшти српската Влада.
Тој објави дека Шојгу му се заблагодарил на Вулин, „како докажан и искрен пријател на Русија, за неговиот придонес во зачувувањето на пријателството и блиските односи меѓу двата народа“, а Вулин нагласил дека „Шојгу е докажан пријател на Србија, кој секогаш стоел покрај српскиот народ во тешките моменти“.
„Забележано е дека неодамнешниот разговор меѓу двајца пријатели, претседателот на Република Србија Александар Вучиќ и претседателот на Руската Федерација Владимир Путин, даде нов импулс за натамошно зајакнување на односите и соработката меѓу двете пријателски земји“, се вели во соопштението.
Владата извести дека „Вулин го информирал Шојгу дека Република Србија ја поправила грешката што ја направила при гласањето за резолуцијата на Генералното собрание на ОН и го променила своето гласање во воздржано“ и дека тој „нагласил дека секогаш е подобро да се признае грешката и да се спасат пријателите“.
„Вулин и Шојгу се согласија да ја продолжат „блиската соработка на полето на безбедноста меѓу двете држави“, се вели во соопштението.