Српскиот вицепремиер Александар Вулин денеска во Москва изјави дека е горд што Србија не е дел од антируската хистерија и што не воведе санкции кон Русија.
На средбата со рускиот министер за надворешни работи, Сергеј Лавров, беше оценето дека билатералната соработка меѓу Србија и Русија е многу добра и дека се развива на сите нивоа, пред се благодарение на пријателските и срдечни односи меѓу претседателот Александар Вучиќ и Владимир Путин, соопшти Владата на Србија.
Тие посочија дека двете земји се заинтересирани за натамошно унапредување на српско-руското стратешко партнерство.
– Вулин и се заблагодари на Русија за нејзиниот принципиелен став за територијалниот интегритет и суверенитет на Србија и за нејзината несебична поддршка во борбата на српскиот народ против резолуцијата за Сребреница, се вели во соопштението.
Министерот Лавров ја изразил својата поддршка за цврстата и доследна политика на српскиот претседател Александар Вучиќ.
Вулин и шефот на руската дипломатија разговарале за моделите и механизмите за воспоставување соработка на Србија со организацијата БРИКС.