Xiaomi го „шокираше“ светот со својот прв автомобил кога го претстави електричниот SU7, кој продолжува да ги надминува продажните очекувања и ја „присилува“ компанијата да ги подигне своите цели, а нов „шок“ пристигна минатиот месец со претставувањето на SU7 Ultra хиперавтомобил.
Неколку дена откако SU7 Ultra ја здогледа светлината на денот, Xiaomi објави дека ќе се појави на пазарот како легален производствен модел во првата половина на 2025 година. Сепак, директорот на Xiaomi, Леи Џун сега уште повеќе го „стесни“ рокот, велејќи дека сериската верзија на моделот SU7 Ultra всушност ќе пристигне на пазарот во првиот квартал од 2025 година, односно помеѓу јануари и март.
SU 7 Ultra ќе пристигне во рацете на сопствениците со „почетнички режим“, што значи дека ќе мора да поминат тестови за да ги отклучат целосните перформанси на автомобилот, истакна Леи. Тоа е превентивна безбедносна мерка, која ќе ги заштити неискусните возачи од самите себе.
Електричниот хиперавтомобил испорачува 1.548 КС, од 0 до 100 km/h забрзува за 1,97 секунди, а до 200 за 5,96 секунди. Максималната брзина е повеќе од 350 km/h.
Серискиот модел ќе има иста структура на шасија, исти три мотори и иста батерија како и прототипот. Леи вели дека ќе биде „малку поскап“ од SU7, што веројатно нема да биде многу бидејќи SU7 е достапен.