Генералниот секретар на НАТО, Јенс Столтенберг, во понеделникот разговараше со новоизбраниот претседател на САД, Џо Бајден за прв пат по претседателските избори во САД на почетокот на овој месец и му ја честиташе победата.
Столтенберг „му се заблагодари што цело време беше поддржувач на НАТО и трансатлантските односи“, се вели во соопштението на НАТО испратено во понеделникот вечерта.
Шефот на НАТО, исто така му рече на Бајден дека се радува на идната „многу тесна соработка за понатамошно зајакнување на врските меѓу Северна Америка и Европа и подготовка за самитот на лидерите на Алијансата следната година“.
За време на мандатот на претседателот во заминување Доналд Трамп, односите меѓу САД и НАТО беа затегнати, потсетува германската новинска агенција ДПА.
Трамп, игнорирајќи ги последиците од искажувањето на своите мисли, ја доведе во прашање американската помош за сојузниците на НАТО во случај на вонредна состојба.
Покрај тоа, тој еднострано објави повлекување на американските трупи од Германија, што беше само еден пример за неговите еднострани потези и, за ужас на сојузниците, дури се закани дека САД ќе го напуштат НАТО.